PAMULO KATO

Assalamu’laikum Wr. Wb.

Mulonyo jalo diserakkan

Kanai kulari nan bapalun

Mulonyo kato di sampaikan

Jari sapuluah ambo susun

Dibukak tambo nan dahulu

Tambo sejarah alam Minang

Niniak Tumangguang urang nan turun

Duo jo niniak Parpatiah

Nan turun ka Tandikek

Dalam daerah sapuluah Koto

Hormatlah ambo ka pangulu

Niniak mamak nan sa-undang

Undang-undang nan turun tamurun

Pusako jawek man jawek

Sampai sakarang kini nangko

Kalo dikaji niniak nan asa

Nan turun ka Sungai Tarab

Turun ka Agam Balai Gurah

Di Kamang nagari nan dihunyi

Di Balai Panjang jolong tibonyo

Mambari salam ambo ka Ulama

Alim Ulama nan sa Kitab

Kitab lah nyato dari Allah SWT

Agamo Islam agamo kito

Kununlah niniak nan piawai

Mukasuik sangajo dalam hati

Nan marantau basamo-samo

Maninggakan ranah sapuluah koto

Mambari salam ambo ka cadiak pandai

Cendekiawan dalam nagari

Sarato pambaco kasadonyo

Manurun bukik kapanasan

Disinan tadapek batu gadang

Manyubarang lalu kasubaliak

Tibo sakali di jambatan

Disusun tulisan di hilangkan

Untuak dibaco jo di bincang-bincang

Antah buuak antah moh baik

Hutang deka ambo manyampaikan

Ba cupak si talago panuah

Ba gantang si Marajolelo

Kalau basiang di nan tumbuah

Kalau manimbang di nan ado

Tumbuah sarupo io kini

Mancaliak satantang mato

Mandanga tantang talingo

Caliak jauah di layangkan

Pandang ampia ditukiakkan

Di layang pandang ka nagari

Di tukiakkan pandang ka dalam kampuang, basuo bunyi papatah;

Di sangko bulek daun nipah

Kironyo picak ba pasagi

Di sangko lipek tak barubah

Kironyo lah tabuak tiok ragi

Raso-pareso kok tak tarang

Di dalam ukua jo jangka

Manuruik barih jo balabeh

Alua cupak dengan gantang

Dek rancak kilek Loyang datang

Intan di sangko kilek kaco

Cupak di lilih rang panggaleh

Jalan di aliah urang paladang

Mulo di darek lalu ka rantau

Turunlah niniak ka Singkarak

Di Ampalu mambuek sawah

Sawah di buek duo tigo

Zaman kiniko nan ma risau

Dek kito niniak jo mamak

Tirih lah datang dari bawah

Ba-a nyo kito manyumbeknyo

Ba-ato nyo lai kini;

Mano sagalo nniak mamak

Alim Ulama cadiak pandai

Ba baliaklah kito ba nagari

Bangunlah Adat dengan Syarak

Wassalam,

Magek, 10 September 2011